Link açıqlığı

Saatnıñ esas haberi

Qırımtatar halqınıñ milliy lideri Mustafa Cemilev bildirdi ki, azat etilgen qırımtatar milliy areketiniñ liderleri İlmi Umerov ve Ahtem Çiygoz cumaaqşamı künü, oktâbrniñ 26-da, Kyivge kele bileler. Bunı o «5 kanal» efirinde ayttı.

«Yarın Kyivde olacaqlardır. Erdoğan ya da baş nazirnen körüşmeleri kerek, soñra mında kelmege isteyler. Anda olarğa tibbiy yardım ve tedaviylev teklif etildi, lâkin olar vazgeçkenler. Tezce mında kelmege isteyler», – dep qayd etti Cemilev.

İlmi Umerovnıñ qızı Ayşeniñ aytqanına köre, Türkiyede azat etilgen qırımtatar milliy areketiniñ liderleri İlmi Umerov ve Ahtem Çiygoznı ekimler baqtı.

İşğal altındaki Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerov oktâbrniñ 25-nde Türkiyege teslim etildi.

Ukraina prezidenti Petro Poroşenko oktâbrniñ 25-de Türkiye prezidenti Recep Tayyip Erdoğanğa Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerovnıñ azat etilmesine köstergen ğayreti içün teşekkürler bildirdi.

Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etken edi. Bunıñnen beraber, Umerovğa eki yıl devamında açıq faaliyet ile oğraşması ve kütleviy haber vastalarında çıqış yapması yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.

Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi. Çiygoznıñ özü çıqarılğan ükümni Aqmescit SİZOsında bulunaraq videobağ vastasınen diñlegen edi. Ahtem Çiygoz 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi.

XS
SM
MD
LG