Qırımdaki FSB idaresi qırımtatar faili Suleyman Kadırovğa qarşı cinaiy işniñ taqiq etilmesini yekünledi. Rusiye taqiqatı onı separatizm çağıruvlarında (Rusiye Ceza Kodeksiniñ 280.1 maddesiniñ 2-nci qısmı) qabaatlay.
Bunıñ sebebi Facebookta paylaşqanları ve qaldırğan izaatları olğan. Bu aqta «Agora» halqara uquq qorçalayıcı gruppasınıñ advokatı Aleksey Ladin Qırım.Aqiqatqa tarif etti.
«Suleyman Kadırov dava malümatlarınen tanış olğan soñ (oktâbrniñ 24-de – QA), dava mahkemege berilecek», – dedi Ladin.
2018 senesi Rusiye prezidenti saylavlarında namzet kösterecegini ilân etken Rusiye alıp barıcısı Kseniya Sobçak, o ve qırımtatar faili Suleyman Kadırovnı Ukrainağa ait Qırım aqqında lafları içün mahküm etilmemeli, dep bildirdi.
2016 senesi oktâbrniñ 5-de Rusiye uquq qoruyıcıları qırımtatar faili Suleyman Kadırovnıñ evine tintüv keçirmege keldi. Tintüv vaqtında bilgisayar ve telefon alındı. Tintüv qadı Rodionovnıñ Rusiye Federatsiyası sıñırlarını tanımamaq ve «Asker» qırımtatar batalyonına qoltutmaq çağıruvlarını ögrenmek Qararı esasında keçirilgen.
2016 senesi oktâbrniñ 11-de Suleyman Kadırovğa qarşı «separatizm» esasında cinaiy dava başlatıldı.
2017 senesi aprel ayındaqırımlı fail ve uquq qorçalayıcı Suleyman Kadırov, o, ekstremistler cedveline kirsetilgeni aqqında beyan etti.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket faalleri, Meclis azalarınıñ evlerinde tintüvler sıqlaştı.
Ukraina Tışqı işler nazirligi (MİD) işğal etilgen Qırımda ukrain vatandaşlarınıñ taqip etilmesinden qasevet çekkenini bildirip, basqını toqtatmağa çağırdı.
