Ukraina halq deputatı, qırımtatar halq Meclisiniñ reisi Refat Çubarov rusiyeli televizion alıp barıcısı Kseniya Sobçaknıñ işğal altındaki Qırım Ukraina toprağı olğanı aqqındaki sözlerinde menfiy çizgiler mevcut olğanını qayd etti. Bu aqta Refat Çubarov Qırım.Aqiqat televizon proyektine bergen izaatında ikâye etip berdi.
«Men bellesem, rusiyeli siyasetçiler özara Qırım Ukraina toprağı olğanı aqqında aytqanlarında toqtatmağa acet yoq. Mında başqa muim mesele bar – olarnen bunı muzakere etmege acet yoq, çünki bizim pozitsiya açıq-aydın olmalı yani: Qırım keri qaytacaq, Ukraina öz mustaqilligini tikleycek, işte o zaman siz biznen Qırım aqqında laf etmege isteseñiz, buyurıñ, oturıñız. Lâkin, ancaq Ukraina mustaqilligi teklengen soñ», – dedi Çubarov.
Ayrıca, onıñ qayd etkenine köre, televizion alıp barıcısınıñ pozitsiyası «yarım-yurum», çünki Sobçaknıñ cumlesinde «halqara uquq noqta-i nazarından Qırım – Ukraina toprağı. Noqta» degeninden soñ devamı yoq.
«Eger de o, öz fikrini devam eterek, Rusiye öz ordusını çıqartmalı, Qırımnı azat eterek, Ukrainağa toprağını keri qaytarmalı... degen olsa edi. Lâkin o böyle bir şey aytmadı», – dep ayttı Çubarov.
Meclis başı Rusiye prezidenti Vladimir Putin «bu mevzunı ilip alır» degen ihtimal de bar olğanını ayta.
«Eger Sobçaknıñ aytqanları Kremlniñ planı ise, o zaman bilmeyim, belki de planına aylânabilir», – dep ilâve etti Ukraina halq deputatı.
Rusiyeli televizion alıp barıcısı olğan Kseniya Sobçak oktâbrniñ 24-nde Rusiye prezidenti saylâvınen bağlı öz programması aqqında söz yürsetkende, Rusiye Qırımnı işğal eterek, öz mecburiyetlerini bozğanını, ancaq yarımadada «pek çoq rusiyeli yaşağanı» sebebinden, bu mesele muzakere etilmek kerek olğanını beyan etti.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
