Qırımda oktâbrniñ 24-de Kreml nezaretindeki Milletlerara munasebetler ve sürgün olunğan vatandaşlar komitetiniñ yañı reisi tayin etildi. «Krıminform» neşiri bildire ki, komitet reberi Lenur Abduramanov oldı.
«Milletlerara munasebetler ve sürgün olunğan vatandaşlar komitetiniñ yañı reisimiz Abduramanov Lenur Azizoviç oldı. Eminim, komitet işini canlandırır», – dep ayttı Qırımnıñ Rusiye yolbaşçısı Sergey Aksenov oktâbrniñ 24-de yarımada ükümetiniñ toplaşuvında.
Bundan evel Abduramanov Kefe memuriyetinde milletlerara munasebetler meselelerinen oğraşqan edi.
Qırım ükümetiniñ saytında Goskomnats reisiniñ tayinlenmesi aqqında malümat daa yoq.
Milletlerara munasebetler ve sürgün olunğan vatandaşlar komitetiniñ sabıq reisi Zaur Smirnov bazarertesi künü, oktâbrniñ 16-da, istifa etti. Soñra Qırımnıñ Rusiye yolbaşçısı Sergey Aksenov Smirnov onıñ talabı ile «semeresiz işten» sebep vazifeden ayırıldı, dep bildirdi.
