Link açıqlığı

Bağçasaraydaki «Salaçıq» qavehanesinde prokuror teşkerüvi yapıldı


Arhiv fotoresimi, «Salaçıq» qavehanesi, Bağçasaray

Oktâbrniñ 23-de Bağçasaraydaki «Salaçıq» qavehanesini prokurorlar teşkerdi. Mında Kreml nezaret etken Qırım prokuraturası, Rospotrebnadzor, yarımadanıñ Fevqulâde vaziyetler nazirligi, bergi hızmeti ve Gosstroynadzor iştirak etti. Bunı qavehane reberligi Qırım.Aqiqatqa bildirdi.

Mezkür hızmetlerniñ vekilleri topraq, sanitar, yanğınğa qarşı ve şeer qurucılığı qanunlarına riayet etilmesini teşkergenler.

Qavehane memuriyeti bütün vesiqalarnı berdi. Rusiye uquq qoruyıcı organları teşkerüv noyabrniñ 15-ne qadar devam etecegini haber etti.

«Salaçıq» qavehanesi – Qırımdaki ilk elâl qavehanelerinden biridir. Milliy hususiyetleri sayesinde qavehane turistlerniñ diqqatını celp etmekte. 2016 ve 2017 seneleri belli Tripadvisor turistik hızmeti «Salaçıqnı» Bağçasaray rayonınıñ eñ güzel qavehanesi olaraq tanıp, oña keyfiyet sertifikatlarını berdi.

XS
SM
MD
LG