Link açıqlığı

Qırımtatar faili Suleyman Kadırov Qırımdaki Rusiye FSB idaresine cinaiy iş malümatlarını ögrenmesi içün çağırıla.

Bunı oktâbrniñ 23-de qırımtatar milliy areketiniñ faali Nariman Celâl bildirdi.

«Oktâbrniñ 24-de saat 15.00 Suleyman Kadırov advokatlarınen beraber FSB idaresine cinaiy iş malümatlarını ögrenmesi içün çağırıla», – dep aytıla Celâlnıñ Facebook haberinde.

Rusiyeniñ Qırımdaki FSB idaresi oktâbrniñ 18-nde qırımtatar faili Suleyman Kadırovqa onıñ qabaatnamesini taqdim etken. Rus taqiqatı Kadırovnı, Rusiye Cinaiy Kodeksiniñ 280.1 mad. 2-nci qısmı esasında qabaatlay – «Rusiye Federatsiyasınıñ topraq bütünligini bozmaq içün halq ögünde yapılğan çağıruvlar». Kadırov qabaatını inkâr ete.

2016 senesi oktâbrniñ 5-de Rusiye uquq qoruyıcıları qırımtatar faili Suleyman Kadırovnıñ evine tintüv keçirmege keldi. Tintüv vaqtında bilgisayar ve telefon alındı. Tintüv qadı Rodionovnıñ Rusiye Federatsiyası sıñırlarını tanımamaq ve «Asker» qırımtatar batalyonına qoltutmaq çağıruvlarını ögrenmek Qararı esasında keçirilgen.

2016 senesi oktâbrniñ 11-de Suleyman Kadırovğa qarşı «separatizm» esasında cinaiy dava başlatıldı.

2017 senesi aprel ayındaqırımlı fail ve uquq qorçalayıcı Suleyman Kadırov, o, ekstremistler cedveline kirsetilgeni aqqında beyan etti.

Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket faalleri, Meclis azalarınıñ evlerinde tintüvler sıqlaştı.

Ukraina Tışqı işler nazirligi (MİD) işğal etilgen Qırımda ukrain vatandaşlarınıñ taqip etilmesinden qasevet çekkenini bildirip, basqını toqtatmağa çağırdı.

XS
SM
MD
LG