Kreml tarafından tayin etilgen Qırım ükümetiniñ yolbaşçısı Sergey Aksönov milletlerara munasebetler ve sürgün olunğan vatandaşlarnıñ işleri boyunca rusiyeli komitetniñ yañı yolbaşçısı olğan Lenur Abduramanovqa, ondan evel bu vazifede çalışqan Zaur Smirnov qabul etken qararlarnı teşkermesini avale etti. Bu aqta Aksönov oktâbrniñ 24-nde özüniñ Facebbok saifesinde yazmaqta.
Aksönovniñ sözlerine binaen, Abduramanov vazifesine tayin etilgeninden soñ, oña avale etilgen ilk vazifedir.
«Bu arada, şimdiki aldan çıqmaq içün nasıl çareler körmek kerek olacağını añlamaq kerekmiz, çünki al-azırda vaziyet bayağı problemli», – dep yaza Aksönov.
Lâkin Aksönov nasıl bir «problemli vaziyetler» aqqında söz ketkenini izaatlamay.
Oktâbrniñ 24-nde Qırımda Kreml nezaretindeki milletlerara munasebetler ve yarımadadan sürgün olunğan vatandaşlarınıñ işleri komiteti başına yañı yolbaşçı tayin etildi. Lenur Abduramanov muessiseniñ yañı yolbaşçısı oldı. O, daa evel Kefe memuriyetiniñ milletlerara munasebetler bölüginde yolbaşçılıq yapa edi.
Komitetniñ evelki yolbaşçısı Zaur Smirnov oktâbrniñ 16, bazaertesi künü istifa etken edi. Ondan soñ, Qırım yolbaşçısı Sergey Aksönov, Smirnov «semeresiz işi» sebebinden onıñ talabı üzerine istifa etkenini bildirgen edi.
