Oktâbrniñ 24 saba saatlarında, Aqmescitniñ Elevatornaya soqağında rusiyeli arbiy tehnika kolonnası tıqanıqlıq olmasına sebep oldı. Qırım.Aqiqat muhbiri haber etkenine köre, kolonna 15 dane yük maşnası ve zırhlı «Tigr» maşnasından ibaret eken.
Arbiy maşnalar saatte 30-40 km tezliknen ketkeni sebebinden soqqaqta aman-aman bir kilometr uzunlıqtaki tıqanıqlıqqa sebep olğan.
2017 senesi mart aynında nevbetteki talimlerden qaytqan arbiy tehnika kolonnası Aqmescit soqaqlarınıñ birindeki areketni aynı şekilde tıqatqan edi.
Rusiye mudafaa Nazirligi işğal altındaki Qırım territoriyasında er ay arbiy talimler keçirgeni aqqında esabat bere.
Ukraina General Ştabında Rusiyeniñ yarımadada keçirgen arbiy talimlerini qanunsız dep tanıy.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
