Bu sene qıtaiy Ukrainanıñ aliy oquv yurtlarında ötkerilgen kiriş kampaniyaları devamında Rusiyeniñ işğaline oğrağan yarımadanıñ 204 sakini, «Qırım – Ukraina» tasil merkezleriniñ hızmetlerinen faydalanıp, oquşqa kirdi. Bunı oktâbrniñ 19-nda Kyivde teşkil olunğan matbuat konferentsiyası devamında Ukraina tasil ve ilim naziriniñ muavini Yüriy Raşkeviç bildirdi.
«Qırım – Ukraina» tasil merkezleriniñ faaliyetine dair malümat böyledir: biñden ziyade adamğa mesleat berildi; bu sene 204 kişi oquşqa kirdi. Beklegenimizden bayağı eksiktir. Amma 2016 senesi oquşqa kirgen 153 nefernen teñleştirilse, bu raqam biraz artqanını köremiz», – dedi Raşkeviç.
Ukrainada iyünniñ 19-nda qırımlı abituriyentlerniñ VNO (Bilgige tışqı mustaqil qıymet kesüv) imtianlarını tapşırmayıp 12 ukrain aliy oquv yurtına qısqartılğan sistema boyunca kirmeleri içün tasil merkezleri çalışıp başlağan edi.
Qırımlılar «Qırım - Ukraina» merkezleriniñ faaliyeti ve ukrain aliy oquv yurtlarına oqumağa kirilmesinen bağlı tafsilâtlı malümat almaq içün Qırım.Aqiqat materiallarını taqip ete bile.
Ukraina prezidenti Pötr Popoşenko iyünniñ 3-nde Qırım ve Donbassnıñ işğal etilgen qısmında yaşağan abituriyentler içün ayırılğan kvotalarnen bağlı №6116 qanunnı imzaladı.
Qanunğa istinaden, orta tasil aqqında vesiqa alğan qırımlı abituriyentler, Zaporojye, Nikolayev, Odessa, ve Herson vilâyetlerinde yerleşken aliy oquv yurtlarına kirmek içün belgilengen kvotalar çerçivesindeki konkurs esasında keçirilgen kiriş imtianlarına köre qabul etilecek. Vesiqağa binaen, kvotalar miqdarı 1000 talebelik bücet yerini teşkil etmekte.
