Oktâbrniñ 20, cuma künü, Kyivde dissident, uquq qorçalayıcı Pötr Grigorenkonıñ doğğanından 110 yıl keçkeni munasebetinen hatıra aqşamı ötkerilecek.
Merasimniñ Facebooktaki saifesinde aytıla ki, «hatıra aqşamında» qırımtatar halqınıñ lideri Mustafa Cemilev, V.İ. Vernadskiy adına Tavriya Milliy Universitetiñ müdiri Vladimir Kazarin, «Almenda» vatandaşlıq tasil Merkeziniñ yolbaşçı muavini Valentina Potapova iştirak etecekler.
Merasim saat 16:00 başlanmalı.
Teşkilâtçılar sırasına Ukraina Haber siyaseti nazirligi ve Q-Hub Qırım leyha ve tasil platforması kirdi.
Pötr Grigorenko – soñunda dissident olğan sovet generalı. Dissidentlik faaliyeti sebebinden repressiyalarğa olğratılıp, ilk kere apiske alınğan soñ, Grigorenko qırımtatarlarnıñ sürgünlikten ana yurlarına qaytmaq aqqı içün alıp barılğan küreşke qoşuldı, qırımtatar failleriniñ cemaat imayecisi olmağa azırlana edi. Bu areketke qoşulğanı sebebinden ekinci kere tutıldı ve beş yılğa apis etilgen edi. O kütleviy (şu cumleden qırımtatarları tarafından bildirilgen) narazılıqtan soñ azat etilgen edi ve ABD-ge icret etti.
