Rusiyege tabi olğan Qırım Variyet ve topraq munasebetleri naziriniñ sabıq muavini Nikita Garanin artıq yarımadadaki Yol hızmetleriniñ yolbaşçısı olğan. Bunı oktâbrniñ 18-nde «Krıminform» saytı bildire.
Qırım Yol hızmetleriniñ veb-saytında Nikita Garanin teşkilât reisi olaraq qayd etilgen, albu ki müessisedeki haberler bölüginde onıñ tayinlenüvine dair haber yerleştirilmegen.
İstilâ etilgen Qırımnıñ Variyet ve topraq munasebetleri naziriniñ muavini Nikita Garanin 2017 senesi avgustnıñ 18-nde Rusiyege tabi olğan Qırım yolbaşçısınıñ fermanınen işinden boşatılğan edi. Vesiqada boşatuvnıñ sebebi olaraq «taraflarnıñ añlaşması»qayd etilgen.
Garanin 1984 senesi Moskvada doğğan edi. Moskva akimiyetiniñ yanındaki Moskva saibkârlıq akademiyasında tasil alğan. 2015-2016 seneleri devamında Kremlge tabi olğan Qırım Naqliyat nazirliginde avtomobil yollarınıñ inkişafı saasında regional siyaset idaresiniñ yolbaşçısı olğan edi. 2016 senesi iyün ayından başlap Qırım Variyet ve topraq munasebetleri naziriniñ muavini vazifesinde çalışqan.
2017 senesi avgust ayında Qırımda «Qırım Yol hızmetleri» devlet şirketiniñ reisi Aleksey Safronovğa qarşı cinaiy dava açılğan edi. O, işke qabul etilgeni vaqıtta sahte vesiqa qullanğanında qabaatlandı.
