Kreml nezaretindeki Qırımnıñ rusiyeli akimiyetine bağlı millitlerara munasebetler komitetiniñ reisi Zaur Smirnov bir kişilik piketler zıncırı ve öz saasını tertipke qoymağa qabiliyeti olmağanı sebebinden istifağa yollandı. Bunı Qırım.Aqiqat Radiosı efirinde qırımtatar halqı Meclisiniñ azası Gayana Yüksel bildirdi.
«Büyük ihtimal, onıñ istifası keçken afta yarımadada keçken bir sıra piketlernen bağlı. Daa da teren baqacaq olsaq – rusiyeli akimiyetniñ olarğa sadıq olıp devlet vazifelerinde çalışqan qırımtatarlarınıñ işinden memnün olmamasındadır. Olarnıñ vazifesi bütün halqnı öz tarafına çekip, işğalni qabul ettirmeknen bağlı edi ve alâ daa devam etmekte. Bir sürü piketler, repressiya ve tintüvler aqqındaki laflar – işğalciler içün imkânsız ve istenilmegen şeylerdir. Zaur Smirnov bunıñ başına çıqamadı», – dep qayd ete Yüksel.
Zaur Smirnov oktâbrniñ 16, bazaertesi künü istifa etti.
Ondan soñ, Qırımnıñ rusiyeli yolbaşçısı Sergey Aksönov, Smirnov semeresiz çalışmaları sebebinden onıñ talabınen istifa etti, dep bildirgen edi.
1999-2013 seneleri arasında Smirnov Yalta şeer şurasında milletlerara munasebetler ve migratsiya idaresiniñ başlığı olıp çalışqan edi.
Rusiye Qırımnı işğal etken soñ, 2014 senesi aprel ayından itibaren o, Qırımnıñ rusiyeli akimiyetine bağlı millitlerara munasebetler ve sürgün olunğan vatandaşlar komitetiniñ reisi vazifesine tayin etilgen edi.
