Kreml nezaretindeki Qırımnıñ rusiyeli yolbaşçısı Sergey Aksönov millitlerara munasebetler ve sürgün olunğan vatandaşlar komitetiniñ reisi Zaur Smirnovnıñ istifasınen bağlı qararını «taraflarnıñ razılığı» ibaresi qoşaraq imzaladı.
Vesiqa oktâbrniñ 16-nda Qırım ükümetiniñ saytında derc etildi.
«Smirnov Zaur Ruslanoviç taraflarnıñ razılığınen Qırım Cumhuriyeti millitlerara munasebetler ve sürgün olunğan vatandaşlar devlet komitetiniñ reisi vazifesinden boşatılsın», – denilmekte qararda.
Kreml nezaretindeki Qırımnıñ millitlerara munasebetler devlet komitetiniñ yolbaşçısı Zaur Smirnov oktâbrniñ 16-nda istifa etti.
Ondan soñ, Qırımnıñ rusiyeli yolbaşçısı Sergey Aksönov, Smirnov semeresiz çalışmaları sebebinden onıñ talabınen istifa etti, dep bildirgen edi.
1999-2013 seneleri arasında Smirnov Yalta şeer şurasında milletlerara munasebetler ve migratsiya idaresiniñ başlığı olıp çalışqan edi.
2014 senesi Qırım Rusiye tarafından işğal etilgen soñ, o Qırımnıñ rusiyeli akimiyetine bağlı millitlerara munasebetler ve sürgün olunğan vatandaşlar komitetiniñ reisi vazifesine tayin etilgen edi.
