Kreml nezaretindeki Qırımnıñ millitlerara munasebetler ve sürgün olunğan vatandaşlar komitetiniñ yolbaşçısı Zaur Smirnovnıñ istifa etmesi, memur qırımtatarlarını rusiyeli akimiyet tarafından belgilengen şekilnen razı olmalarına mecbur etalmağanı sebebinden oldı.Bu aqta oktâbrniñ 16-nda Qırım.Aqiqatqa bergen izaatında qırımlı faal Zair Smedlâyev söz yürsetti.
«О, (Zaur Smirnov – QA) qırımtatarlarını buğavlarnen Kreml tarafından oña belgilengen statusnı sevmege mecbur etalmadı», – dedi Smedlâyev.
Smedlâyevniñ fikrine köre, Kremlniñ işğal altındaki Qırımda qomşu Rusiyede ötkerilecek prezident saylâvından evel yapqan ilk kadrlar deñiştirüvi degildir.
«Prezident saylâvindan evel qırımtatarlarınıñ reyleri ihtiyac bar. Moskva içün bu muim. Qırımtatarları saylâvlarda iştirak etken taqdirde, Qırımnıñ deñişken statusına qoltutqan kibi olacaq», – dep bildirdi faal.
Kreml nezaretindeki Qırımnıñ millitlerara munasebetler devlet komitetiniñ yolbaşçısı Zaur Smirnov oktâbrniñ 16-nda istifa etti.
Ondan soñ, Qırımnıñ rusiyeli yolbaşçısı Sergey Aksönov, Smirnov semeresiz çalışmaları sebebinden onıñ talabınen istifa etti, dep bildirgen edi.
1999-2013 seneleri arasında Smirnov Yalta şeer şurasında milletlerara munasebetler ve migratsiya idaresiniñ başlığı olıp çalışqan edi.
2014 senesi Qırım Rusiye tarafından işğal etilgen soñ, o Qırımnıñ rusiyeli akimiyetine bağlı millitlerara munasebetler ve sürgün olunğan vatandaşlar komitetiniñ reisi vazifesine tayin etilgen edi.
