Link açıqlığı

Aksönov: qırımlılarnen sistematik surette çalışmaq yerine Smirnov bayramlar teşkil ete edi


Kremlge tabi olğan Qırım yolbaşçısı Sergey Aksönov, onıñ talabı ile semeresiz çalışmaları sebebinden Qırımnıñ millitlerara munasebetler devlet komitetiniñ yolbaşçısı Zaur Smirnov istifa arizasını imzalağanını haber etti.

«Smirnovnıñ işi semeresiz olğanını tüşünem. Milliy siyaset saasında komitet tarafından ötkerilgen tedbirler, esas olaraq, resmiyet sıfatında keçti. Bütün milletlerniñ vekillerinen çalışmaq, vatandaşlarnı qabul etmek, er kün sistematik iş alıp barmaq yerine, iç bir mana taşımağan bayram tedbirlerine diqqat ayırıla edi», – dep yazdı Aksönov Facebookta.

Qırımnıñ rusiyeli yolbaşçısı dey ki, millitlerara munasebetler – pek mürekkep ve hassas bir saa olıp, «mevcut olğan problemlerniñ çezilmesinde bir taraflı yanaşmanı qabul etmez».

«Zametli olıp, bütün milletlerniñ vekillerinen çalışmaq lâzim», – dep aytıla bildirüvde.

Rusiyeli KHV oktâbrniñ 19-nda haber ettiler ki, Kreml nezaretindeki Qırımnıñ millitlerara munasebetler devlet komitetiniñ yolbaşçısı Zaur Smirnov vazifesinden ketecegine dair ariza yazğan.

1999-2013 seneleri devamında Smirnov Yalta şeer şurasınıñ millitlerara meseleler ve migratsiya idaresiniñ yolbaşçısı olıp çalışqan edi.

Qırım Rusiye tarafından istilâ etilgen soñ, 2014 senesi aprel ayından berli Qırımnıñ millitlerara munasebetler devlet komitetiniñ yolbaşçısı vazifesine tayin etilgen edi.

XS
SM
MD
LG