Aqmescitteki Rusiye MVD idaresi aliy oquv yurtı talebelerinen körüşüv keçirerek, ictimaiy ağlardaki ekstremizmi muzakere etti. Bu aqta nazirlikniñ matbuat hızmati bildirmekte.
«Esas diqqat ictimaiy ağlarda tecavuzğa çağırğan ekstremizmnen bağlı materialğa çekildi. Talebeler, Rusiye qanunını bozğanlar cinaiy cevapkârlıqqa çekilgeni aqqında tenbiyelendi», – denilmekte haberde.
Politsiya bergen malümatqa köre, talebelerge çeşit türlü ekstremistik teşkilâtlar mevcut olğanı, terroristik areketlerniñ neticesi, gençlerniñ buña celp etilüvinde qullanılğan çeşit usullar aqqında ikâye etilgen.
Bunıñ arfesinde Rusiye Taqiqat komiteti Aqyar mekteplerinde ekstremizmnen bağlı «profilaktik subetler» keçirgen edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
