Link açıqlığı

Saatnıñ esas haberi

Çubarov: bizler halqımıznıñ haysiyet ve birligini saqlağan qırımtatarlarınıñ epsine minnetdarmız


Qırımtatar halqınıñ Meclisi Rusiye tarafından işğal etilgen yarımadada qalğan qırımlılarğa qol tutmaq içün, bütün imkânlarnı qullanmağa areket ete. Kerek resurslarnıñ temin etilmesine qırımtatar halqınıñ özü yardım ete. Bu aqta Qırım.Aqiqatqa qırımtatar halq Meclisiniñ reisi, Ukraina halq deputatı Refat Çubarov bildirdi.

«Bizler,imkânı ve çare tapqan şekline köre, qırımtatar halqınıñ haysiyet ve birliginiñ saqlanmasında iştirak etken er bir qırımtatarına minnetdarmız. Bizler insanlarnıñ balalarğa yardım etmek, advokatlarğa qol tutmaq içün nasıl birleşkenini köremiz. Bügün artıq babaları apiske atılğan balalarnıñ sayısı yüzge yetti. Kün keçken sayın advokat sayısı ep artmaq kerek, Qırımdan ğayrı, Rusiyede de qırımtatarları mahkeme etilgen yerlerde bulunmaq içün resurslar tapmaq kerek», – dep qayd etti Çubarov.

O, bu şekildeki yardım devam ettirilecegini de ayttı.

Qırım Rusiye nezaretine keçkenden soñ, FSB yarımadada muntazam surette insanlarnı tutıp ala, tintüvler keçire, mustaqil jurnalist, qırırmtatar faalleri, muallefet ve Ukraina tarafdarı olğan cemaat erbapları ve diniy azınlıqlarnı teşkil etkenlerni sorğulay. Uquq qorçalayıcılar rusiyeli küç hadimleriniñ işbu areketlerini siyasiy ceetke esaslı dep tanıy.

Qırımtatar faalleri öz nevbetinede bar küçüni birleştirip, rusiyeli küç hadimleriniñ areketleri sebebinden ağır ağa tüşken ailelerge yardım etmek maqsadınen hayriye fondları ve aktsiyalar teşkil ete.

Oktâbrniñ 14, cumaertesi künü, Rusiye işğal etken bütün Qırım boyunca, yarımadada rusiyeli küç hadimleriniñ, husussan qırımtatarları, Qırım musulmanlarına yapılğan repressiyalarına qarşı bir kişilik piketlerge onlarnen insan çıqqan edi.«Qırım birdemligi»niñ malümatına binaen, piketlerde 100-den ziyade insan iştirak etken, 30-dan ziyadesi tutulıp politsiya idarelerine alıp ketilgen.

XS
SM
MD
LG