Link açıqlığı

Qırımlılar küç idareleri keçirgen repressiyalarğa qarşı bir kişilik piketlerge çıqtı, tutulıp alınğanlar bar


Qırımdaki bir kişilik piket, 2017 senesi oktâbrniñ 14-di

Bügün Aqmescitniñ Geroyev Stalingrada soqağı etraflarında bir kişilik piketke çıqqan faal tutulıp, belli olmağan tarafqa alıp ketilgen. Bu aqta özüni belli etmege istemegen bir faal Facebook’ta haber etmekte.

«Şimdiçik politsiya hadimleriniñ, bir kişilik piket keçirgen adamnıñ yanına kelip, qaba bir şekilde onı tutaraq, maşnağa tıqqanlarını körgen qaba davranışnıñ şaatı oldım. Onı alıp kettiler. Yani, hırsızladılar demek», – dep ikâye ete faal Facebooktaki videomuracaatında.

O, Qırım.Aqiqatqa bergen izaatında, ne yerge alıp ketkenlerini bilmegenini de ayttı.

Tahminlerge köre, küç idaresiniñ hadimleri, «Qırım musulmanları – siziñ qomşuñız, amma terrorist degil» yazısı olğan plakatnen turğan faal Memet Lümanovnı tutıp alğanlar.

«Qırım birdemligi»niñ regional temsilcisi olğan Alimdar Facebook’ta bir kişilik piketlerniñ fotoresimlerini derc etken. Faller ayrıca «Terroristlerni qıdırmaq – faydasız bir iş», «Musulmanlar terrorist degiller» yazılı plakatlarnen de çıqqanlar.

«Rustem ağanı tutıp alıp, Kefege alıp kettiler», – dep bildire Alimdar.

Qırım Aqiqat meseleniñ aslını bilmege arekete ete.

Rusiyeli küç idareleri bu hususta er angi bir izaat bermedi.

​Qırım işğalinden soñ, yarımadada hususan qırımtatarları ğayıp olıp başladı. Bu arada Rusiye nezaretindeki Qırım Taqiqat Komiteti «yarımadada qırımtatarları kütleviy bir şekilde ğayıp olmay» dey.

XS
SM
MD
LG