Link açıqlığı

Qırımda Keriç köpüriniñ kemeri yerleştirilgeni aqqında esabat berildi


Keriç köpüri kemeriniñ köterilüvi, 2017 senesi oktâbrniñ 12-si

Oktâbrniñ 13-nde, Qırımda qurucılar Keriç köpürindeki avtoyol kemerini yerleştirgenleri aqqında esabat berdi. Bu aqta Qırım köpüriniñ informatsion markezi bidirmekte.

«Qırım köpürindeki avtoyol kemeriniñ yerleştirmesinen bağlı deñiz operatsiyası yekünlendi. Kemer suv üstüne 35 metrlik proyekt yüksekligine köterilip, destek direkleri üzerine sabitlendi», – denilmekte haberde.

Rusiye qurulayatqan köpür destek direkleri üzerine kemer yerleştirlmesi sebebinden 11-14 oktâbr arasında Keriç boğazından gemilerniñ keçişini yaşaqlağan edi.

Rusiyeniñ proyektine binayen, qurucılıq bitken soñ, Keriç köpürinen deñiz seviyesi arasındaki yükseklik 33 metrni teşkil etecek.Ondan da ğayrı, eger Keriç boğazından 200 metr uzunluğundaki gemiler keçişine izin berilgen olsa, şimdi Rusiye yalıñz 160 metr uzunluğundaki gemiler keçecek degen sıñırlama kirsete.

Ukrainanıñ vaqtınca işğal etilgen territoriyalar nazirligi, Rusiyeniñ Keriç boğazından keçecek gemilernen bapşı sıñırlaması BMTniñ (OON) deñiz uquqı Konventsiyasına zıt kelgenini bidire.

Keriç boğazında köpür qurulması kerekligi aqqında Putin ta 2014 senesi işğalden soñ aytqan edi. Köpür 2018 senesine qadar qurulıp, 2019 senesi işke tüşürilecegi aqqında söz berigen edi.

Ukraina Rusiyenen Keriç köpüriniñ qurulışı ile bağlı añlaşmadan 2014 senesi, Rusiye Qırımnı işğal etken soñ çıqtı.

XS
SM
MD
LG