Link açıqlığı

Saatnıñ esas haberi

Qırımdaki repressiyalarnıñ yañı dalğası sakinlerniñ faalleşmesinen bağlı - Kurbedinov


Qırımlı advokat Emil Kurbedinov
Qırımlı advokat Emil Kurbedinov

Qırımlı advokat Emil Kurbedinovnıñ fikrine köre, oktâbr ayında işğal altındaki yarımadada keçken tintüv ve insanlarnıñ tutıp alınuvı, qırımtatarlarınıñ faalleşmesinen alâqalı. Bu aqta o oktâbrniñ 13-nde Kyivde ötekerilgen matbuat konferentsiyasında söz yürsetti.

«Siyasiy esnasqa qol tutmağa kelgen insanlarnıñ sayısı ep artıp barmaqta. Faallerniñ areketi quvetleşe, bizim «Qırım birdemligi» adlı birleşmemiz inkişaf ete.Bu sebepten Rusiye Qırımdaki basqısını şeddetlendire», – dedi advokat.

O, «nevbettiki repressiya dalğası» - halqara teşkilât ve strukturalarnıñ beyannamelerine qarşı bir reaktsiya olğanını qayd etti.

«Soñki sefer tutulıp alınğanlar – onıñ BMT (OON) ve Avropa Parlamentiniñ beyannamelerine qarşı yapqan bir reaktsiyadır. Rusiyeli akimiyet kelecekte dünyağa, Rusiye terrorist ve ekstremistlernen ne şekilde küreşkenini köstermek maqsadınen qırımtatarlarına basqı yaparaq, olarnıñ arasından olar özüni, dersiñ er angi bir ekstremist teşkilâtnıñ azasıdır dep tanıycaq bir kâğıtlarnı imzalatmaq istey», – dep qoştı advokat.

Qırım işğalinden soñ yarımadada mustaqil jurnalistler, cemaat ve qırımtatar milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG