Qırımlı advokat Emil Kurbedinov ve uquq qorçalayısı Enver Kadırov ukrain akimiyetinden qırımlı siyasiy mabüslernen aileleriniñ statusı meselesini çezmelerine çağıralar. Bu aqta olar oktâbrniñ 13-nde Kyivde ötekerilgen matbuat konferentsiyasında söz yürsetti.
Kurbedinov Ukraina siyasiy mabüslerniñ status meselesi «boş mekânda qalıp, yalıñız kâğıt üzerindeki qanunlarda yazılğan olmaması içün» onı çezmek kerek olğanını qayd etti.
«Eger bu (siyasiy mabüs statusı - QA) çezilse, avvokat ve uquq qorçalayıcılarnıñ eline zarar körgenlerge yardım etmek içün bir unsur keçken olur edi», – dep ilâve etti Kurbedinov.
Bunen bir sırada Enver Kadırov, Ukraina siyasiy mabüslernen bağlı qanun bazasını işlep çıqararaq, olar saip olğan aq-uquqlar ve devlet olarğa ne şekilde qol tutabilecegi aqqında yazmaq kerek.
Qırım işğalinden soñ yarımadada mustaqil jurnalistler, cemaat ve qırımtatar milliy areketiniñ faalleri, Meclis azaları ve Hizb ut-Tahrir ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
