Qırımtatar resurs merkezi Bağçasarayda qırımlılarnıñ rusiyeli silâlı küç hadimleri tarafından tutulıp apiske alınması – siyasiy ceetke esaslı olıp, halqlar ve dinler arasında bir çatışma çıqarılması maqsadınen yapılmaqta dep saya. Bu aqta merkezniñ beyanatında söz yürsetilmekte.
«Namus serbestligini aqqını bozğan işğalci küç strukturalarınıñ areketleri siyasiy ceettke esaslı olıp, halqlar ve dinler arasında bir çatışma çıqarılması maqsadınen yapılmaqta. Yarımadadaki bu areketler onıñ işğal etilgen vaqtından başlap sistematik şekil qazandı, FSB hadimleri yarımadada farqlı tüşüncege saip olğanlarğa qarşı küreş neticesi olaraq, muntazam surette tintüvler keçire, jurnalist, faaller, cemaat erbaplarını sorğulay», – denilmekte beyannamede.
Ayrıca, tintüvler, qırımtatarlarınıñ tutulıp, apiske alınması yarımadada Qırımnıñ tamır halqına qarşı yapılğan ksenofobiya misali olmaqnen bir arada, onı qorquzma usullarından biri olğanına işaret etilmekte.
Oktâbrniñ 12-nde Rusiyeniñ nezaretindeki Aqmescitniñ Kiev rayon mahkemesi oktâbrniñ 11-nde tutulğan Bahçasaraynıñ altı sakinini 2 ay apiste tutma qararını qabul etti.
Oktâbrniñ 11-nde saba, Bağçasaraydaki bir qaç musulman qırımtatarınıñ evinde rusiyeli küç hadimleri tintüv keçirgen edi. Olar yasaqlanğan «Hizb ut-Tahrir» teşkilâtınıñ azalığında şeklenmekte.
Qırım Rusiye nezaretine keçkenden soñ, FSB yarımadada muntazam surette tintüvler keçire, jurnalist, faaller, cemaat erbaplarını sorğulay, qırımtatarı, muallefetçi, Ukraina tarafdarları ve diniy azınlıq temsilcilerini tutup ala. Uquq qorçalayıcılar rusiyeli küç hadimleriniñ bu areketlerini siyasiy ceetke esaslı dep tanıy.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek oğrunda terroristik usullarnı red ete ve Rusiyede adaletsizce taqip etilgenini aytalar. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etken edi.
