Link açıqlığı

Qırımtatar asıllı ukrain yırcısı Jamala, Birleşken Milletler Teşkilâtınıñ erkânına kirgen Halqara Migratsiya Teşkilâtınıñ hoşmeramlı elçisi olğan. Bunı BMT Haber merkezi malüm etti.

«Yırcı, insan ticaretine qarşı global küreşke qoşulğan. Jamala, qulluqnıñ zemaneviy şekillerini yoq etmek içün alıp barılğan bilgi kampaniyasında iştirak etecek. Bu meselege bağışlanğan mahsus video-levhada yer alacaq. İşbu klip ukrain telekanallarında oktâbrniñ 18-nde – Avropada insan ticaretine qarşı küreş künü qayd etilecekte – yayınlanacaq», – dep aytıla bildürüvde.

BMT matbuat hızmetiniñ bildirgenine köre, insan ticareti ve qulluqnıñ zemaneviy şekilleri global cinayet olaraq tanıla ve dünyanıñ bütün memeleketlerinde yer almaqta.

2016 senesi Jamalanıñ qırımtatarlarınıñ sürgüni aqqındaki «1944» adlı türküsi İşveçte keçken «Eurovision» yır konkursında oña ğalebe qazandırğan edi. Ukrain yırcısınıñ ğalebesinden soñra, 2017 senesi bu yarış Kyivde ötkerildi.

XS
SM
MD
LG