Avropanıñ sertlik köstermeyüv pozitsiyası Qırımdaki vaziyetke menfiy tesir etebile, dep ayttı Qırım.Aqiqat Radiosı «Kündüzki şou» efirinde qırımtatar faali, uquq qorçalayıcı Sinaver Kadırov.
Onıñ sözlerine köre Kreml, bütün qırımtatarlarını radikalizm ve ekstremizmde qabaatlağa azırlanıp, yarımadada razı olmağanlarnıñ epsini silâlı usulnen bastırmaq niyetinde.
«Çeçenistanda da buña beñzer şey yapılğan edi. Çeçenler birinci cenkte ğalebe qazanğanlarında Hasavyurt añlaşması yapılğan edi, ondan soñ sentâbrniñ 11-ndeki vaqiqalardan soñ Rusiye Çeçenistan boylâp uçaqlarınen keçmege fursat qazandı dep saydı ve dünya Rusiyeniñ bu areketlerini farqlı şekilde qabul etken edi. İşte, men de bundan qorqam», – dedi uquq qorçalayıcı.
Sinaver Kadırov söz narazı olğanlarnıñ sıqıp çıqarılması ve kerçekten de silâ qullanılması mümkün olacaqını qayd etti.
«Şimdi bile silâlı basqı mevcut, yalıñız kimse öldürilmey. Qullanğan taktikalar işte şudır: ya susasıñız, ya da bizim qaydelerge uyup yaşaysıñız... Lâkin bu alda bile yarımada territoriyasında ealiniñ bir qısmını qaldırıp, digerini sıqıp çıqarmaq kibi bir proyektleri olması da istisna degildir. İnsanlar Qırımnı terk etmesi içün, eali üstünde terror estirmege isteyler», – dep izaatladı qırımtatar areketiniñ faali.
Qırım Rusiye nezaretine keçkenden soñ, FSB yarımadada muntazam surette tintüvler keçire, jurnalist, faaller, cemaat erbaplarını sorğulay, qırımtatarı, Ukraina tarafdarları ve diniy azınlıq temsilcilerini tutup ala. Uquq qorçalayıcılar rusiyeli küç hadimleriniñ bu areketlerini siyasetnen bağlı dep tanıy.
