Rusiyege tabi olğan Aqmescitniñ Kiev rayon mahkemesi oktâbrniñ 12-nde kün evelsi Bağçasarayda tevqif etilgen qırımtatarı, 12 balanıñ babası olğan Server Zekiryayevni eki ayğa apiske alğan. Rus silâlı hızmetleri onı Rusiyede yasaq etilgen «Hizb ut-Tahrir» teşkilâtınıñ azası olaraq şeklemekte. Bunı Qırım.Aqiqatqa advokat Aleksey Ladin bildirdi.
«Dekabrniñ 11-ne qadar apis etilgen. İmaye tarafı mahkeme ögünde daa yımşaq qararnıñ alınılması – ev apisi ya da pey berilmesi – mümkün olğanını isbatladı. Onıñ eki balası – saqat, ve o ailesini özü baqa. Dava malümatlarına baqıp, qabaatlar esassız olğanını körem. Taqiqatnıñ aytqanı gizli körüşüvler, asılında açıq körüşüvler edi. Müşterimniñ sözleri ise – başqa din mensuplarına nasıl davranılmaq kerek olğannıñ tolerantlıq nümünesidir», – dep qayd etti advokat.
Mahkemeci, Zekiryayev şaatlarnı qorquta bilecegini, delillerni yoq etecegini ya da başqa şekilde taqiqatqa tesir etecegini tüşüngen.
İmaye tarafı bu ükümge itiraz bildirmege niyetli.
Tevqif etilgen başqa qırımlılarğa nisbeten mahkeme qararı daa alınmağan, çünki qırımtatar tilinden tercime etecek terciman beklenile.
Yüzden ziyade adam, tevqif etilgenlerni desteklemek içün kelip, Mahkeme binası qarşısında toplaşqan.
Oktâbrniñ 11-nde, çarşenbe künü, saba Bağçasarayda rus silâlı hızmetleri bir-qaç qırımtatarınıñ, musulmannıñ evinde tintüv keçirgeni malüm oldı.
Qırım yarımadası Rusiye tarafından istilâ etilgen soñ, yarımadada FSB tarafından muntazam surette jurnalistler, failler, cemaatçılar tintile ve sorğuğa çekile. Uquq qorçalayıcılar rus silâlı hızmetlerniñ böyle areketleri siyasiy sebeplerden yapılğanını ayta.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek oğrunda terroristik usullarnı red ete ve Rusiyede adaletsizce taqip etilgenini aytalar. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etken edi.
