Hersonlı cemaat failleri işğal altındaki Qırım memuriy sıñırında yerleşken «Pravıy sektor»nıñ «Gönülli ukrain korpusı» «Çonğar» bazası külesinde asılması planlaştırılğan ekige altı köleminde olğan Ukraina bayrağı yaptırğanlar. Bu aqta Qırım.Aqiqatqa bazanıñ yolbaşçısı ikâye etip berdi.
«İnsanlar ve hususan o taraftaki gümrükte çalışqan Rusiyeli işğalciler körsin dep yapamız. Baqsınlar da, açuvları çıqsın, bizim toprağımız olğanını unutmasınlar. Bizim topraq bizim olmalı», – dey İtalyanets lağaplı Stanislav.
Bayraq oktâbrniñ 15, bazar künü asılması planlaştırıla.
Qırım 2014 senesiniñ başında Rusiye tarafından işğal etilgen soñ Ukrainanıñ esas qısmı ve yarımada arasında memuriy, lâkin asılında tam bir «sıñır» peyda oldı. Qırım vaqtınca işğal etilgen territoriya olaraq ilân etildi. Memuriy sıñırda «Kalançak», «Çongar» ve «Çaplınka» olmaq üzre üç kiriş-çıqış kontrol noqtası çalışmaqta.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
