Rusiyeniñ nezaretinde çalışqan Aqmescitniñ Kiev rayon mahkemesi qarşısında yüzden ziyade adam toplaştı. Failler oktâbrniñ 11-nde, Rusiyede ve istilâ etilgen Qırımda yasaqlanğan «Hizb ut-Tahrir» teşkilâtınıñ azalığında şeklenip, Bağçarayda tevqif etilgen qırımtatarlarğa destek bildirmege keldi. Keçende tutılğan şahıslar endi mahkeme binasına ketirilgen. Bunı o yerde bulnğan qırımtatar faili Zair Smedlâyev Qırım.Aqiqatqa bildirdi.
«Birinci Gazel maşnasından mabus çıqarılğanda, neiçündir, başına çuval keçirilgen edi, artından daa bir-qaç maşna keldi. Mabuslarnıñ çıqarılğanı körünmesin dep, er tarafnı qapatqanlar. Bir-qaç yüz adam toplaştı. Ne tünevinki apis etüvler, ne de para cezaları adamlarnı qorquzmadı, adamlar tura, bekley, öz destegini bildire. Bir yıl evelsi apis etilgen sözde«yaltalı dörtniñ» soy-sop, yaqınları bu yerdeler. Tünevin tevqif etilgenlerniñ soy-sopı ve yaqınları endi mahkeme binasına kirgen, bese-belli tezden mahkemeler başlanacaqtır», – dedi Smedlâyev.
Toplaşqanlarnı rus silâlı hızmetçileri nezaret ete, olarnı tenbiyeley – «pek toplanmamağa» rica ete.
Oktâbrniñ 11-nde, çarşenbe künü, saba Bağçasarayda rus silâlı hızmetleri bir-qaç qırımtatarınıñ, musulmannıñ evinde tintüv keçirgeni malüm oldı.
O yerde rus uquq qoruyıcıları, tintilgen evlerniñ yanına kelgen adamlarnı tutıp, eñ azından 8 kişini tevqif etken.
Rus haber vastaları, Rusiye Federal telükesizlik hızmetiniñ (FSB) matbuat hızmetine atıf etip, Qırımda silâlı hızmetler Rusiyede ve onıñ işğaline oğrağan Qırımda yasaq etilgen«Hizb ut-Tahrir» teşkilâtınıñ Bağçasaraydaki üceyresini yoq etkenlerini haber etti.
Advokatlar, tevqif etilip, tintüvden soñ FSB-ge ketirilgen altı adam rus silâlı hızmetlerinde Rusiyede yasaq etilgen «Hizb ut-Tahrir» teşkilâtınen bağlı olğanında şeklengenlerini tasdiqladı.
Qırım yarımadası Rusiye tarafından istilâ etilgen soñ, yarımadada FSB tarafından muntazam surette jurnalistler, failler, cemaatçılar tintile ve sorğuğa çekile. Uquq qorçalayıcılar rus silâlı hızmetlerniñ böyle areketleri siyasiy sebeplerden yapılğanını ayta.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek oğrunda terroristik usullarnı red ete ve Rusiyede adaletsizce taqip etilgenini aytalar. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etken edi.
