Bağçasarayda oktâbrniñ 11-nde saba qırımtatarlarnıñ evlerinde ötkerilgen tintüvler vaqıtında rus silâlı hızmetleri tarafından tutılğan faillerniñ mahkemesi keçmekte. Bunı Qırım.Aqiqatqa qırımlı adliyeci Lilâ Gemeci haber etti.
«Episi olıp doquz adam tevqif etilgen, olardan beşi köteklenilgen. Şimdiki vaqıtta olarğa qarşı memuriy malümatlar talil etile. Olar, içtimaiy yerlerde bir vaqıtta toplaşıp, cemaat tertibini bozğanlarında qabaatlana», – dedi adliyeci.
Gemeci qayd etti ki, bu kibi qanun bozuvı sebebinden para cezası ya 15 künlik apis müddeti tayin etilmek mümkün.
Oktâbrniñ 11-nde, çarşenbe künü, saba Bağçasarayda rus silâlı hızmetleri bir-qaç qırımtatarınıñ, musulmannıñ evinde tintüv keçirgeni malüm oldı.
O yerde rus uquq qoruyıcıları, tintilgen evlerniñ yanına kelgen adamlarnı tutqan.
Rus haber vastaları, Rusiye Federal telükesizlik hızmetiniñ (FSB) matbuat hızmetine atıf etip, Qırımda silâlı hızmetler Rusiyede ve onıñ işğaline oğrağan Qırımda yasaq etilgen«Hizb ut-Tahrir» teşkilâtınıñ Bağçasaraydaki üceyresini yoq etkenlerini haber etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı dep saya. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleridir.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek oğrunda terroristik usullarnı red ete ve Rusiyede adaletsizce taqip etilgenini aytalar. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etken edi.
