Çeh Cumhuriyetiniñ prezidenti Miloş Zeman Rusiyeniñ Qırım işğalini «bitken iş» dep saya ve meseleni Ukrainağa tazminat ödep çezmege teklif ete. Bunı o Avropa Şurası Parlament assambleyasında Ukraina deputatı Aleksey Gonçarenkonıñ sualine cevap berip ayttı.
«Mence, Ukraina içün tazminat olur – ya maddiy şekilde, ya da cermay ya da gaz vastasınen ödenecek», – dep tekrarlay Zemannıñ cevabını «Yevropeyskaya pravda».
Neşirniñ bildirgenine köre, Çeh prezidenti Qırım işğaliniñ qanunğa zıt kelgenini tanıp, mesele çezilgenini ayttı.
«Qırım işğal altında, şübesiz. Bu bitken iştir (fait accompli)», – dep ayttı çeh lideri.
Zemannıñ aytqanına köre, Ukraina işğal etilgen yarımada tazminini almasa, «Avropa cenki» başlar. Buña esaslanıp, Zeman Ukraina Qırımnı qaytarmağa tırışsa, cenk olacağını tüşüne.
«Bizler Avropa cenkine yol bermemelimiz, bunı añlamaq kereksiñiz», – dep hitap etti o deputatlarğa.
2014 senesi martnıñ 16-da Qırımda ve Aqyar şeerinde dünyada tanılmağan referendum olıp keçti. Bundan soñ Rusiye Qırımnı öz terkibine qoştı. Ukraina, Avropa Birligi, Amerika Birleşken Devletleri mezkür rey berüvni tanımadılar. Martnıñ 18-de Rusiye prezidenti Vladimir Putin Qırım Rusiyege «qoşulğanını» ilân etti.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
