İspanyalı senator Pedro Agramunt PASE reisi vazifesinden müddetinden evel istifa etmege mecbur qaldı. Bu vaqia Assambleyada bu meselenen bağlı rey berilmesine bir qaç kün qalğanda yüz berdi. Onıñ özü istifa etmesi, masharalıqnen öz vazifesini terk etkeni – Moskva tarafından qullanılmağa istegen ğarplı siyasetçiler içün ciddiy bir tenbilevdir.
Moskva ise, Pedro Agramuntnıñ ziyaretinen 100 faiz faydalanıp oldı, demek mümkün. Rusiye propagandası PASE reisi rusiyeli deputatlarnen beraber Suriyeni ziyaret etip, diktator Başar Asadnen quçaqlaşqanını köstermege ihtiyacı bar edi. Kreml bunı baş etmege yaradı. Agramuntnıñ siyasiy karyerasınen bağlı kelecegi işbu propaganda kampanyanıñ teşkilâtçılarını asla qasevetlendirmey edi. Aynı zamanda PASE reisinden böyle bir «cesür» adımı içün «banderalar», «amerikalı agentler», «rusofoblar» intiqam alalar dep añlatmaq mümkün edi. Moskva ise, intiqam ve rusofoblıq aqqında ikâye etmekni yahşı becere.
Bu insanlar demokratiyanı qullansalar da, ondan nefretleneler. Olar tek küçnü ürmet eteler
Elbette ki, ukrainalı oquyıcı, ğarplı bir siyasetçi Suriyege barıp kelmesinen öz itibarını feda etkenini añlamaqta zorluq çekmektedir. Agramuntqa bu ne kerek edi? Lâkin ğarplı siyasetçiler de çeşit türlü ola. Ancaq, Agramunt – bügünki künde İspanyanıñ idaresinde bulunğan Halq firqasınıñ üyken nesiline ait olğanını bilmek kerekmiz. Ukrainada pek az kimse onıñ nasıl bir firqa olğanını añlay. Er angi bir siyasiy spravoçnikten sizler olarnıñ sağ merkeziyetçiler olğanını bilmeñiz mümkün. Aslında Halq firqası avtoritar rejim yıqılğan soñ frankist firqasınıñ harabeleri üzerinde qurula ve çoqqa barmadan siyasiy arenadan bulunğan kerçek merkeziyetçişlerni sıqıp çıqararaq, solcularnıñ yekâne alternativasına aylâna. Onıñ teşkilâtçıları sırasına demokratiyanı qabul etmege mecbur qalğan Franko rejiminiñ sabıq memurları kire. Lâkin olar arasındaki ekseriyetiniñ demokratiyağa olğan munasebeti, sabıq kommunistlerniñ munasebetini añdıra.
Bu insanlar demoklratiyanı qullansalar da, ondan nefretleneler. Olar tek küçnü ürmet eteler. Aynı zamanda, avtoritar rejim devrinde olarnıñ muvafaqiyetli ömür tecribesi esapqa alınğan taqdirde, olar professionalca ayaq uydurğanlardan biri olğanları seyrek degildir. Agramuntnıñ rusiyeli arbiy uçaqlarınen asla problemi olmağanı ayrıca, zemaneviy Rusiyeniñ onıñ gençligi keçken o zamandaki frankist İspaniyağa oşağanı sebebindendir. İspaniyalı parlament azası - PASE qoltuğında bulunuvını degil de -hususan işbu uçaqta bulunuvını özüniñkiler arasında dep is etkenge oşay.
«Fikir» rubrikasında bildirilgen fikir-tüşünceler müelliflerniñ noqtaiy nazarını aks ettirip, muarririyetniñ baqışlarınen bir olmaması mümkün