Bazarertesi künü, oktâbrniñ 9-da, Türkiye prezidenti Recep Tayyip Erdoğan Ukrainağa resmiy ziyaretinen kele. Ukraina prezidenti memuriyetiniñ matbuat hızmeti bildirgenine köre, ziyaret vaqtında Ukraina ve Türkiye arasındaki yüksek seviyeli Strategik şurasınıñ altıncı toplaşuvı olacaq.
Haberge köre, taraflar «bütün strategik yönelişlerde eki taraflı işbirligini terenleştirme yollarını», halqara barışıq ve regional havfsızlıq meselelerini muzakere etecekler. Eki taraflı vesiqalarnıñ imzalanması beklenile.
Erdoğan Ukraina Yuqarı Radasınıñ spikeri Andriy Parubiy, baş nazir Volodımır Groysman ve Ukrainadaki türk cemiyetiniñ vekillerinen körüşmege planlaştıra.
«Ukraina ile strategik ortaq munasebetlerini terenleştirmek içün yañı yönelişler muzakere etilecek, bunıñnen bağlı farqlı vesiqalar imzalanacaq», – dep aytıla haberde.
Türkiye prezidentiniñ saytı da Ukraina ile strategik işbirligini muzakere etme planları aqqında haber ete. Türkiye tarafınıñ ilânında ziyaret sırasında işğal etilgen Qırım ve yarımadada qırımtatarlarnıñ al-vaziyeti muzakere etilecek, dep aytıla.
Poroşenko ve Erdoğan aqımdaki seneniñ sentâbr ayında Birleşken Milletler Baş assambleyası vaqtında körüşken ediler. Türkiye lideri Ukraina zenaatdaşınen bu ziyaretniñ planlarını laf etken edi. Bunıñnen beraber, Ukraina topraq bütünligi ve devlet sıñırlarına qoltutqanını tekrar bildirgen edi.
