Link açıqlığı

Saatnıñ esas haberi

Çubarov: Türkiye Qırım içün Rusiyege qarşı sanktsiayalar kirsetmedi, lâkin Ukraina bütünligine qol tutmaqta


Türkiye Cumhuriyeti Rusiyege qarşı onıñ Qırım işğali ve Ukraina ihtiyarındaki Donbass territoriyalarında yapqan areketlerinden dolayı Avropa birligi kirsetken sanktsiyalarğa qoşulmadı, lâkin buña baqmadan Ukrainanıñ topraq bütünligine qol tutmaqta. Bu aqta qırımtatar halqı Meclisiniñ reisi, Ukraina halq deputatıRefat Çubarov Azatlıq Radiosına bergen intervyusındasöz yürsetti.

«Türkiye Ukraina topraq bütünligi, Qırım, Donetsk ve Lugansk vilâyetleriniñ mustaqilligine riyayet etilmesi prensipleri üzerinde turmaqta. Türkiye Rusiyeniñ mındaki areketlerine qol tutmay. Kerçekten de Türkiye buña beñzegen problemlerge özüniñ noqtai nazarı olğanını bildirerek, Avropa ve halqara sanktsiyalarğaqoşulmadı», – dedi o.

Çubarovnıñ fikrine köre, Türkiyeniñ böyle bir siyaset izlemesiniñ sebebi – Avropa Birliginiñ Türkiye Cumhuriyetini AB qabul etmekte qararsız qalğanınen bağlı.

«On yıllar devamında Türkiye Avropa Birliginiñ tam manalı bir azası olmağa areket etmesine rağmen, birleşken Avropa er sefer red etmek içün bir manaçıq tapa edi. Şimdi ise bizler, Türkiyeniñ bergen sert bir cevabını körip oturamız», – dep qoştı qırımtatar halqı Meclisiniñ yolbaşçısı.

Aynı zamanda Refat Çubarov, Türkiye ve Ukraina prezidentleri arasında al-azırdaki işanç seviyesi saqlanıp qalmasına çağırdı.

Türkiye prezidenti Recep Tayyip Erdoğan oktâbrniñ 9-nda resmiy ziyaretnen Kyivge kelip çıqtı. Ziyaret esnasında Türkiye-Ukraina Strategik Şurasınıñ altıncı toplaşuvı ötkerilecek.

Erdoğan Ukraina Yuqarı Radası yolbaşçısı Andrey Parubiy, baş nazir Vladimir Groysman ve Ukrainadaki türk cemaatçılığınıñ temsilcilerinen körüşmege planlaştıra.

Poroşenko ve Erdoğan bu yıl sentâbr ayınıñ soñunda BMT Genassambleyasınıñ toplaşuvında körüşken ediler. İşte o zaman Türkiye lideri ukrain meslekdeşinen al-azırdaki ziyaret planlarını muzakere etip, Türkiye Ukrainanıñ mustaqilliginen dünyaca tanılğan sıñırları içindeki topraq bütünligine qol tutqanını tasdıqlağan edi.

XS
SM
MD
LG