Türkiye prezidenti Recep Tayyip Erdoğan oktâbrniñ 9-nda, Türkşye-Ukraina Strategik Şurasınıñ altıncı toplaşuvında iştirak etmek içün, Ukrainağa resmiy ziyaret ile teşrif buyuracaq. Türkiye devlet yolbaşçısı öz ziyareti devamında Ukraina yolbaşçılarınen işğal etilgen Qırım meselesini ve qırımtatarlarnıñ vaziyetini muzakere etecegi beklenile. Bunı Türkiye prezidentiniñ resmiy web-saytı bildire.
«Eki taraflı ve regional sualler Şuranıñ Kyivde ötkerilecek toplaşucında muzakere etilecek, onda prezindet Erdoğan ve Ukraina prezidenti Petro Poroşenko iştirak etecekler», – dep aytıla bildirüvde.
Erdoğan Ukraina Yuqarı Rada yolbaşçısı Andriy Parubiynen, baş nazir Volodımır Groysmanen ve Ukrainada tükr cemiyetiniñ vekillerinen de körüşecek.
«Ukraina ile strategik işbirlikniñ devamılı ilerilemesi içün yañı yöñelişleri muzakere etilecek, bu hususta çeşit vesiqa ve protokollar imzalanacaq. Bunen beraber Qırım meselesi ve qırımtatarlarnıñ vaziyeti de muzakere etilecek», – dep aytıla haberde.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
