Link açıqlığı

Çubarov Donbassnıñ ğayrıdan integratsiya olmasınen bağlı qanun leyhasına Qırımnı azat etüv normaları da qoşulmasına çağırdı (+ video)


Ukraina halq deputatı Refat Çubarov, oktâbrniñ 6-nda Yuqarı Rada minderinde prezidentniñ Donbassta mustaqillikniñ temin etilmesinen bağlı qanun leysası (№7163) hususındaki rey berüvnen evel yapqan çıqışından, bu qanun leyhasına qol tuttı, lâkin qanunnıñ ekinci oquşında Qırımnıñ azat etilmesinen alâqalı normalarnıñ kirsetilmesine çağırdı.

Çubarovnıñ sözlerine binaen, artıq işğal altındaki Qırımnı Ukrainanıñ işğal etilgen diger topraqlarından ayırmaq olmaz.

«Hususan teklif etilgen №7163 sanlı qanun leyhası vastasınen bizim ahır soñu bütün dünya, partnörlarımız ve duşman ögünde yekâne bir formulağa irişmek içün acayip bir fursatımız bar. Bu –Qırım Muhtar Cumhuriyeti ve Aqyar şeeri de halqara cemaatçılıq tarafından tanılğan sıñırlar içinde olmaq üzre, Ukrainanıñ topraq bütünliginiñ yekâne bir formulasıdır. Böyleknen, işbu proyektten başlap bütün metin içinde bizler Qırımnı ilâve eterek, azat etilmesine alıp baracaq normalarnı belgilemek kerekmiz. №7163 sanlı qanun leyhasınıñ birinci oquşına ve ekinci oquşına Minsk añlaşmaları ve Qırım kibi kilit noqtalarnıñ çezilmesi şartınen rey berilmesine çağıram», – dedi o.

Oktâbrniñ 6-sı, Cuma künü, Ukraina Yuqarı Radası prezidentniñ (№7163)​Donbassta mustaqillikni temin etüv siyasetiniñ hususiyetlerinen bağlı qanun leysasını bir esas olaraq qabul etti.

Oktâbrniñ 4-nde Ukraina prezidenti Petro Poroşenko Yuqarı Radağa vaqtınca işğal etilgen Donetsk ve Lugansk vilâyetlerinde, Ukraina devlet mustaqilligini temin etüv boyunca devlet siyaseti hususiyetlerinen bağlı qanun leyhasını teklif etken edi.

Ondan da ğayrı qanun leyhasında ukrain akimiyet organları çalışmağan Donbassnıñ ayrı bir rayonlarındaki uquqiy rejimniñ belgilenmesi de teklif etilmekte. Ukrain parlamentine Donbasstaki vaziyetni barışıq yolunen çezilmesinen bağlı prezidentniñ daa bir qanun leyhası teklif etile ve hususan «Samopomiç» fraktsiyasınıñ azaları olğan halq deputatlarınen baş nazir yardımcısı Oksana Sıroidten prezident teklifine bir alternatif olaraq başqa qanun leyhası (№7163-1) teklif etilmekte.

XS
SM
MD
LG