Link açıqlığı

Cemilev üzerinde adı yazılğan silânen taqdirlendi


Ukraina mudafaa Nazirligi Ukraina halq deputatı, qırımtatar halqınıñ lideri Mustafa Cemilevni üzerine adı yazılğan silânen taqdirledi.

«Yararlıqları, aynı zamanda insannıñ qanuniy aq-uquqlarını qorçalağanı içün Mustafa Cemilev «Üzerine adı yazilğan silâ» belgisinen taqdirlendi. Ukraina mudafaa Nazirliginiñ mezkür belgisi Ukraina mudafaa Naziri ordu generalı Stepan Poltorak tarafından taqdim etildi», – denilmekte Cemilevniñ Facebookında.

Taa gençliginde Mustafa Cemilev «Qırımtatar gençler birligini» teşkil ete. Teşkilât halqnıñ tarihiy vatanına qaytarılması oğrunda küreşkeni içün sovet organları tarafından yasaq etile.

1963 senesi mahkeme Mustafa Cemilevni ilk defa apishanege oturta. 1975 senesi nevbetteki mahkeme devamında o 303 kün açlıq tuta ve onı on ay devamında mecburen zond arqalı aşata ve glükoza inesi yapalar. «Sovetlerge qarşı» köstergen faaliyeti içün o beş kere mahkemege çekile. Umumen alğanda Cemilev 15 yıl apishane ve sürgün yerlerinde keçire.

Perestroyka zamanında Mustafa azatlıqqa çıqa ve 80-nci yıllarnıñ soñunda ailesinen beraber Qırımğa qayta. 1991 senesi o qırımtatar halqı Meclisiniñ yolbaşçısı olaraq saylâna. O, qırımtatarlarınıñ işbu idariy organına 2013 senesiniñ küzüne qadar 22 yıl devamında yolbaşçılıq yapa.

2014 senesi baar ayındaki vaqialardan soñ rusiyeli akimiyet Mustafa Cemilevniñ Rusiyege ve onuñ işğali altındaki Qırımğa kirmesini yasaqlay.

XS
SM
MD
LG