Qırımnıñ rusiyeli akimiyeti tarafından tibbiy müessiselerde kirsetilgen online talon berilüvi, ahır-soñunda nevbetlerniñ artmasına alıp bardı. Qırım.Aqiqat Radiosı efirinde aqyarlı jurnalist Andrey Vasilyev böyle bir közetivinen paylâştı.
«Dersin ki, aslında hastalarnıñ qaydı bilgisayar vastasınen yapıla ve bu esnas tez ve qolay olmalı, amma online talon alınğanına baqmadan, epbir hastahanege barıp, 40-50 kişi artında nevbet bekleyerek, kene de bilgisayar vastasınen yapılğan blanknı toldurmaq kerek. Bu da ekim kirmesten evel yapıla, ondan da ğayrı ekimge kirmek içün nevbette turmalı. Talonğa köre nevbet bir qaç kün, atta aftadan soñ kelmesi mümkün», – dep qayd ete jurnalist.
Qırımlı cemaat erbabı olğan Edem Dudakov, nevbetlerni bürokratik protseduralar da zorlaştırğanını qayd ete.
«Ekim siziñ şikâyetleriñizni diñlemesinden evel pek çoq kâğıt toldurmağa mecbur qala. O, künde 30 kişiden ziyade hasta qabul etmege istemey, çünkü ziyade çalışqanı içün oña kimse ilâve para tölemey. Bir de bügünkü nevbetni tünevin kirip yetiştiralmağanlar «beslep tura». Bu şartlardan dolayı ekimler işten boşap, özlerine hususiy klinikalardan iş qıdırıp başlaylâr», – dep bitire faal.
İşğal altındaki Qırım sakinleriniñ hastahanelerdeki uzun nevbet ve yavaş berilgen hızmetnen bağlı şikâyetleri ketken sayın arta. Kreml nezaretindeki memurlar buña tekmilleşmegen sağlıq saqlav sisteması qabaatlı dep aytmaqta.
