Link açıqlığı

Radio Svobodanıñ videoları içtimaiy ağlarda bir milliard kereden ziyade baqıldı


2017 senesiniñ birinci 9 ayı devamında Radio Free Europe/Radio Liberty videoları içtimaiy ağlarda bir milliard kereden ziyade baqıldı.

Media birligi 20 memleket içün 23 tilde video azırlay. Eñ çoq Ukraina, Rusiye, Ermenistan, Özbekistan, Afğanistan ve Pakistandaki internet qullanıcıları videolarnı baqa. Videolar eñ çoq Facebook ve YouTubeda paylaşıla.

RFE/RL videoları ve vesiqalı filmleri Sundance, Berlin kinofestivali, em de Moskva kinofestivalinde 2017-2018 seneleri kösterilecektir.

Radio Svobodanıñ Ukraina muarririyeti azırlağan ve «Qırım.Aqiqat» leyhasınıñ videoları Facebookta RFE/RL populâr videolarınıñ dörtlügine kirdi. Olar 52 million kere seyir etildi.

2017 senesi yanvar-avgust ayları içinde Radio Svobodanıñ Ukraina muarririyeti azırlağan Haparcılıqnıñ ögüni alma meseleleri milliy agentliginiñ hadimlerine berilgen mukâfat aqqında videosı Facebookta eñ çoq diqqat celp etken edi. Mukâfat miqdarı 200 biñ grivnağa yete edi. Video aman-aman bir million kere baqıldı.

Ukrain uçucısı Aleksandr Akopov aqqında video da qayd etilmeli. O, yolcu uçağınıñ burun qısmı qırılğanına ve bir şey körünmegenine baqmadan, onı qondırıp oldı. Video aman-aman 800 biñ kere baqıldı ve tahminen 24 biñ kere paylaşıldı.

Aqmescitte Rusiyeniñ Qırım işğali qayd etilgenini köstergen video Facebooktaki «Qırım.Aqiqat» saifesinde 700 biñ kereden ziyade baqıldı.

YouTubeda eñ populâr videolarından biri Radio Svobodanıñ rusça çıqqan 23 daqqalıq «Donbass.Realii» yayını oldı. Onı 571 biñ kere baqqanlar.

Radio Free Europe/Radio Liberty akimiyet tarafından matbuat serbestligi sıñırlanğan ya da şimdilik cemaat yaşayışınıñ norma seviyesine kelmegen memleketlerniñ sakinlerine muracaat etip, demokratik qıymet ve institutlarnı ileriletmege istey. Radio Svoboda jurnalistleri yerli kütleviy haber vastalarında olmağan malümatnı bere: tsenzurasız haber, mesüliyetli fikir, meselelerniñ açıq muzakere etilmesi.

XS
SM
MD
LG