Ukraina prezidenti Petro Poroşenko oktâbrniñ 4-nde «Donetsk ve Lugansk vilâyetleriniñ vaqıtınca işğal etilgen topraqlarında Ukraina devlet suverinitetiniñ pekitilmesine dair devlet siyasetiniñ hususiyetleri aqqında» qanun leyhasını Yuqarı Radada qayd etti. Bunı ukrain parlamentiniñ resmiy veb-saytı bildire.
Saat 15:00 qanun leyhasınıñ metini saytta açılmay edi. Açıqlamalarda, bu qanun leyhası içün mesül olğan esas komitet – milliy havfsızlıq ve mudafaa komiteti olğanı qayd etile. Prezident bu qanunnıñ leyhasını acele olaraq belgiledi.
Ukraina Yuqarı Radasınıñ milliy havfsızlıq ve mudafaa komitetiniñ kâtibi İvan Vinnik oktâbrniñ 4-nde bildirdi ki, Donbassnen alâqalı eki qanun leyhası prezident tarafından qayd etilecek.
«Daa bir qanun leyhası tışqı işler komitetine kelecek», – dep qayd etti Vinnik. Deputatnıñ sözlerine köre, şu ekinci qanunnıñ leyhası «halqara munasebetlerinen bağlı suallerge» ait olacaq.
Bundan evel bu afta parlamentniñ tışqı işler komiteti reisi Anna Gopko dedi ki, ukrain prezidenti oktâbrniñ 4-nde Donbassnıñ yañıdan integratsiysına dair qanun leyhasını parlamentte qayd etmeli, sessiya zalında o endi oktâbrniñ 5-nde muzakere etilmek mümkün.
