Link açıqlığı

Qırım mahkemesinde qırımlılar, ekstremistik ücereniñ azaları olğanında qabaatlanıp, apiske alınğan


Kremlge tabi olğan Kiyev rayon mahkemesi üç qırımtatarı Renat Suleymanov, Arsen Kubedinov ve Talât Abdurahmanovnı apiske qapadı. Böylece, olar noyabrniñ 29-na qadar apishanede qalacaq, dep haber etti Qırım.Aqiqat muhbiri.

Qırımlılarnıñ advokatları, taqiqat tarafından deliller ketirilmegenine dair israr ete edi, ve bu munasebetnen daa yımşaq ihtiyat çaresini baqmağa – ev apisini tainlemege rica ete edi.

Bunen beraber, rus prokurorı, ihtiyat çaresi olaraq apis etüv müddeti baqılmaq kerek olğanını aytıp, mahkümler «ağır cinayet» işlegenlerinde şeklengenini beyan etti.

Bundan evel, tevqif etilgen Seyran Mustafayev mahkeme qararınen noyabrnıñ 29-na qadar ev apisine alınğanı aqqında haber etilgen edi.

İstilâ etilgen Qırımda oktâbrniñ 2-nde dört qırımtatarı – Renat Suleymanov, Arsen Kubedinov, Seyran Mustafayev ve Talât Abdurahmanov – öz evlerinde tintilgen edi. Rusiye silâlı hızmetçileri protokollar tizip, qırımlılarnı namalüm (belli olmağan) tarafqa alıp ketken edi. Bundan soñ, olar Aqmescitniñ muvaqqat apishanesinde bulınğanları malüm oldı.

Tutılğan qırımlılar ekstremistik üceyreniñ qurulmasında ve onda iştirak etmesinde qabaatlana.

Qırımdaki Rusiye FSB idaresi, «Tebliğ Cemaatı» islâm teşkilâtınıñ üç üceyresi yoq etilgeni aqqında esabat seslendirdi.

«Tebliğ Cemaatı» – siyasetten çette turğan diniy areket. 1926 senesi İndistanda Mevlâna Muhammed İlyas tarafından tesis etilgen edi. Areketniñ esas maqsadı – keniş eali arasında islâmiy maneviy deñişmeler yapmaq ve, içtimaiy ya da iqtisadiy vaziyetine baqmadan, bütün musulmanlarğa hitab etmektir. 2009 senesi Rusiye Aliy mahkemesi bu teşkilâtnı ekstremistik olaraq tanıdı ve faaliyetini yasaqladı.

XS
SM
MD
LG