Bazarertesi künü, oktâbrniñ 2-nde, qomşu Rusiyeniñ arbiy flot gemileri ve deñizastı gemileri istilâ etilgen Qırımda planlaştırılğan arbiy talimler ötkermekte. «Krıminform» tarafından berilgen haberge köre, bunı Qara deñiz flotunıñ malümat berüv bölüginiñ yolbaşçısı, birinci rang kapitanı Vâçeslav Truhaçev bildirdi.
O: «Bir-qaç künde gemi erkânları, saildeki raketalı artilleriya birliklerinen, deñiz aviatsiyası ve flotnıñ ava imayesinen işbirlik qurıp, deñizastı gemilerge qarşılıq, minalardan temizleme ve ücüm taktikalı gemi taqımlarında talimlerden keçecek», – degen.
Onıñ sözlerine köre, talimlerde tahminen 30 gemi ve destekçi-gemi, 20-den ziyade Qara deñiz flotunıñ uçaqları iştirak etecek.
2010 senesi aprelniñ 21-nde Ukrainanıñ sabıq prezidenti Viktor Yanukoviç ve Rusiyeniñ sabıq prezidenti Dmitriy Medvedev, Harkivde añlaşma imzalap, Rusiye Qara deñiz flotunıñ Aqyarda qalacaq müddetini 2042 senesine qadar uzatqan ediler. Vesiqanıñ adı «Harkiv añlaşmaları» oldı.
2014 senesi aprelniñ 2-nde Rusiye Federatsiyasınıñ prezidenti Vladimir Putin «RF Qara deñiz flotunıñ Ukrainada bulunmasına dair añlaşmalarnıñ lâğu etilmesi aqqında» qanun imzaladı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
