Link açıqlığı

Ukrain ombudsmanı rus işdesini Umerovqa yeterli tibbiy yardımnıñ berilmesine kefil olmağa rica ete


Valeriya Lutkovska

Ukraina Yuqarı Radasınıñ insan aqlarından vekâletlisi Valeriya Lutkovska rus ombudsmanı Tatyana Moskalkovağa muracaat etip, qırımtatarlarnıñ liderlerinden biri olğan İlmi Umerovqa yeterli tibbiy baqım almaq aqqını teminlemege rica etti. Bu aqta Lutkovskanıñ beyanatında bildirile, onı matbuat hızmeti derc etken.

«İlmi Umerovnıñ yüregine tibbiy ameliyat yapılğan edi, onıñ qanında şeker seviyesi yüksek, ve özü Parkinson hastalığına oğrağan, onıñ sağlığı kün-künden zayıflaşa, bu sebepten o daima tibbiy eyyetniñ nezaretinde bulunmalı», – dep aytıla Valeriya Lutkovskanıñ mektübinde.

Ukrain ombudsmanı dey ki, İlmi Umerovnıñ serbestligini sıñırlağan ceza onıñ ayatı içün aqiqaten telükelidir.

Kreml nezaretindeki Aqmescit rayon mahkemesi sentâbrniñ 27-nde qırımtatar milliy areketiniñ liderlerinden biri olğan İlmi Umerovqa nisbeten öz qararını çıqardı. Umerov eki yıllıq yaşav tarzındaki koloniyada qalmasına üküm etildi. Bunıñnen beraber, Umerovğa eki yıl devamında açıq faaliyet ile oğraşması ve kütleviy haber vastalarında çıqışta bulunması yasaqlandı. Umeronıñ özü oña qarşı açılğan dava siyasiy sebeplerden alıp barılğanını beyan etti. Resmiy olaraq Kyiv, AB ve halqara uquq qorçalayıcı teşkilâtlar bu ükümni takbih etti ve onı qanunsız tanıdı.

XS
SM
MD
LG