Qırımtatar halqınıñ yetekçilerinden biri İlmi Umerov oktâbrniñ 2-nde Aqmescit rayon mahkemesinden ükümniñ metinini ala bildi. Bunı Qırım.Aqiqat mühbiri bildire. Ükümge köre, Umerov 2 yıl devamında yaşav tarzı koloniyasında qalmalı.
«Umerov İlmi Rustemoviç, RF CK 208.1 maddesiniñ 2-nci qısımına binayen, cinayet işlegeni tasdiqlanğan, oña, kütleviy haber vastalarında ve rabıta ağlarında, şu sırada internet ağında, çıqışlar yapmaqnen bağlı cemaat faaliyeti 2 yıllıq müddetke yasaqlanğan, esas ceza olaraq o 2 yılğa yaşav tarzı koloniyasına alınacaq», – dep buyurıla ükümde. Ükümniñ fotokopiyası Qırım.Aqiqatta mevcut.
İmaye şaatlarınıñ bergen ifadeleri, mahkeme qararına binayen, «subyektiv şekil almaqta» ya da asılında «cinaiy davada isbatlanması kerekli olğan vaziyetlerni belgilemek içün emiyetli degiller».
Cinaiy dava başlatılğan ve evelki taqiqat alıp barılğan vaqıtta yapılğan ceryan hatalarına dair imaye tarafınıñ bergen delilleri mahkemede «astında obyektiv delilleri yoq» kibi tanıldı.
Umerov ögünde qoyulğan sıñırlar – yerinden ayırılmaq yasağı – ükümniñ amelge keçmesine qadar şart olacaq.
Üküm metininde yazıla ki, İlmi Umerov keçken sene avgustnıñ 18-nden sentâbrniñ 7-ne qadar psihiatrik statsionarda qalğanı – esas ceza müddetiniñ esabına keçecek. Umerovnıñ ükümine köre, o (berilgen itiraz ilk mahkemeniñ qararını deñişmesiz qaldırğan taqdirde – QA) yaşav tarzı koloniyasına «devlet parasına özü» barmalı.
Kreml nezaretindeki Aqmescit rayon mahkemesi sentâbrniñ 27-nde qırımtatar milliy areketiniñ liderlerinden biri olğan İlmi Umerovqa nisbeten öz qararını çıqardı. Umerov eki yıllıq yaşav tarzındaki koloniyada qalmasına üküm etildi. Bunıñnen beraber, Umerovğa eki yıl devamında açıq faaliyet ile oğraşması ve kütleviy haber vastalarında çıqışta bulunması yasaqlandı. Umeronıñ özü oña qarşı açılğan dava siyasiy sebeplerden alıp barılğanını beyan etti.
