Kremlge tabi olğan Qırım Yuqarı mahkemesinde ukrain faili Vladimir Baluhnıñ davası qoşma taqiqatqa yolanıldı. Bunı oktâbrniñ 2-nde Qırım.Aqiqatqa bergen izaatında qırımtatar faili Zair Smedlâyev haber etti.
«Dava Aqşeyh mahkemesine yollanıldı, çünki anda kerçekten ciddiy surette cinaiy-ceryan kodeksiniñ maddeleri bozulğan edi», – dedi o.
Oktâbrniñ 2-nde Kremliniñ nezaretindeki Qırım Yuqarı mahkemesinde qırımlı, ukrain faili Vladimir Baluhqa berilgen ükümge qarşı şikâyet arizası baqılmaq kerek edi.
İşğal etilgen Qırımnıñ Aqşeyh mahkemesi avgustnıñ 4-de ukrain faali Vladimir Baluhnıñ ükmüni çıqardı – umumiy rejimli apishanesinde 3 yıl ve 7 ay yatacaq, 10 biñ ruble miqdarında para cezasını ödeycek.
Fail öz qabaatını itiraf etmedi, onıñ imayesi ükümge qarşı itiraz bildirdi.
Ukrain uquq qorçalayıcıları İnsan aqları boyunca Avropa Mahkemesine muracaat etip, ukrain faali Vladimir Baluhnıñ taqip etilmesine şikâyetçi oldı.
Ukraina Tışqı işler nazirligi, ukrain vatandaşı Vladimir Baluhnıñ ükümi munasebetinen qatiyen qarşı narazılıq beyan etti ve onıñ taqip etilmesini toqtatmağa talap etti.
FSB Vladimir Baluhnı 2016 senesi dekabrniñ 8-nde yaqalağan edi. FSB hadimleri Vlaidimir Baluhnıñ evinde çardaqta 90 patron ve bir-qaç TNT blokları tapılğanını beyan etti.
Kremlge tabi olğan Qırım akimiyeti Vladimir Baluhtan noyabrniñ 29-nda öz evininiñ divarında pekitilgen «Kök yüzü (Nebesnaya sotnâ) Qaramanlarınıñ soqağı, 18-ci ev» yazısını çetke almağa talap etti.
Baluhnıñ imayesi ise tasdiqlay ki, o ukrain tarafdarı olğanı sebebinden – divarındaki yazı ve azbarında Ukraina bayrağı asılğanı içün – basqılarğa oğratıldı.
