Link açıqlığı

Çubarov: Rusiye, Qırımda qırımtatarlarnıñ apis etip, BMT areketlerini mahküm etmege tırışa


İşğal etilgen Qırımda qırımtatarlarnı mahküm etip, Rusiye, Kremlniñ Ukrainağa yapqan ücümini tenqit etken BMT ve başqa halqara teşkilâtlarğa qarşı üküm çıqarmağa areket ete. Bunı sentâbrniñ 30-nda Kyivde İlmi Umerovqa destek bildirmek içün teşkil etilgen merasim devamında Qırımtatar Milliy Meclisiniñ reisi Refat Çubarov beyan etti.

«Bügün er angi halqara teşkilât qorqmazdan «işğal» terminini qullana. Ve Rusiye işğalci olğanına dair fikirleri içün İlmi Umerovnı ve Nikolay Semenanı taqip etip – amelde Rusiye BM Teşkilâtını, Baş Assambleyasını mahküm etmek ıntıla», – dedi Çubarov.

Onıñ fikirine köre, «bir de birisi, Putinnen dialog qurmağa kerek, dep aytacaq olsa, Qırımğa barıp İlmi Umerovnıñ yanında mahkümniñ skemlesine oturmalı».

Meclis reisi: «Ğarbiy devletleriniñ er angi yolbaşçısı, «evelâ sanktsiyalarnı red etmeli» aytıp, Qırım – ekinci dereceli olğanını söylese, özü añlamalı ki, amelde bu Qırımda ukrain devletine sadıq qalğanlarnı ve qırımtatarlarnı yoq etmek içün ruhset berecek», – dep qayd etti.

Refet Çubarov, qırımtatar halqı – Rusiye tecavuzınıñ esas alğan nişanı olğanını beyan etti.

Kreml nezaretindeki Aqmescit rayon mahkemesi sentâbrniñ 27-si, çarşenbe künü, qırımtatar milliy areketiniñ liderlerinden biri olğan İlmi Umerovqa nisbeten öz qararını çıqardı. Umerov eki yıllıq yaşav tarzındaki koloniyada qalmasına üküm etildi. Bunıñnen beraber, Umerovğa eki yıl devamında açıq faaliyet ile oğraşması ve kütleviy haber vastalarında çıqışta bulunması yasaqlandı.

Umerovnıñ imayesi, Rusiye apishanesi Parkinson, şeker ve yürek hastası olğan İlmi Umerovğa kerekli tibbiy yardım kösterip olamaz, dep tüşüne.

XS
SM
MD
LG