Rusiye kütleviy haber vastaları Qırımda Ukraina Mudafaa nazirligi içün «casuslıq yapmasında şeklengen» Dmitriy Dolgopolov ve Anna Suhonosova yaqalanğanınıñ videosını derc etti. Videonı Facebookta «REN TV Novosti» paylaştı.
Videoda Rusiye uquq qoruyıcıları Dolgopolov ve Suhonosovanı tutalar. Sorğuda Dolgopolov Rusiyeniñ gizli malümatını Ukraina Mudafaa nazirligine bergenini ayta.
Rusiyeniñ Federal havfsızlıq hızmeti sentâbrniñ 29-da Qırımda Ukraina içün casuslıq yapmasında şeklengen eki Rusiye vatandaşı yaqalanğanını bildirdi.
Ukraina Baş ştabınıñ spikeri Vladislav Seleznev Qırım.Aqiqatqa bildirdi ki, işğal etilgen Qırımda tutulğan Dmitriy Dolgopolov yarımada işğalinden evel Ukraina Silâlı Quvetlerinde arbiy hızmette bulunğan edi, 2014 senesi fevral-mart aylarında ise Rusiye ordusına keçti.
Ukraina havfsızlıq hızmetiniñ matbuat hızmeti Qırım.Aqiqatqa şimdilik bir de bir izaat bermege azır olmağanını bildirdi.
İstihbarat idaresi Qırım.Aqiqatqa şimdilik izaat bermeycegini bildirdi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
