Link açıqlığı

Rusiye Federal havfsızlıq hızmeti Qırımda «Ukraina içün casuslıq yapqan» eki kişi yaqalanğanını bildire


Sentâbrniñ 29-da Rusiye Federal havfsızlıq hızmeti Ukraina içün casuslıq yapmasında şeklengen eki Rusiye vatandaşı yaqalanğanını bildirdi. Bu aqta Rusiye haber neşirleri FSB Cemaat bağları merkeziniñ malümatına esaslanıp haber ete.

«Aqmescitte Rusiye Federal havfsızlıq hızmetiniñ hadimleri Rusiye vatandaşları Suhonosova Anna Stanislavovna ve Dolgopolov Dmitriy Aleksandroviçni yaqaladı. Soñkisi Qırımda arbiy hızmette buluna. Bu şahıslar Qara deñiz flotunıñ faaliyetine dair malümat toplap, Ukraina mahsus hızmetlerine devlet sırını aydınlata ediler», – dep aytıla haberde.

Ukraina havfsızlıq hızmetiniñ matbuat hızmeti Qırım.Aqiqatqa bunıñnen bağlı bir izaat bermege azır olmağanını bildirdi.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG