Kreml nezaretindeki Qırım mahkemesi tarafından bunıñ arfesinde eki yılğa yaşav tarzı koloniyasında qalmasına mahküm etilgen qırımtatar milliy areketiniñ liderlerinden biri olğan İlmi Umerov tez vaqıtta azat etilmek kerek. Bu aqta sentâbrniñ 27-nde Facebookta, Ukraina boyunca PASE Monitoring komitetiniñ maruzacı olğan alman siyasetçisi Axel Fischer yazmaqta.
«Rusiye akimiyeti Qırımnıñ qanunğa zıt kelgen şekilde işğal etilgenine qarşılıq köstergen Ukraina vatandaşlarını taqip eterek, tutıp alması qabul etilecek kibi degildir. Onıñ içün men rusiyeli akimiyetni tez vaqıtta ve sözsüz bir şekilde Umerovnı azat etmelerine çağıram», – denilmekte haberde.
Kreml nezaretindeki Aqmescit rayon mahkemesi sentâbrniñ 27-si, çarşenbe künü, qırımtatar milliy areketiniñ liderlerinden biri olğan İlmi Umerovqa nisbeten öz qararını çıqardı. Umerov eki yıllıq yaşav tarzındaki koloniyada qalmasına üküm etildi. Bunıñnen beraber, Umerovğa eki yıl devamında açıq faaliyet ile oğraşması ve kütleviy haber vastalarında çıqışta bulunması yasaqlandı.
Umerovnıñ imayesi, Rusiye apishanesi Parkinson, şeker ve yürek hastası olğan İlmi Umerovğa kerekli tibbiy yardım kösterip olamaz, dep tüşünmekte.
Yaşav tarzı koloniyası – qomşu Rusiyede ceza berüv müessiseleriniñ bir çeşitidir. Muqayıtsızlıq sebebinden cinayet işlegenler ve kiçik ya da orta ağırlıqtaki cinayetni ilk defa işlegenler bu kibi yerlerde ceza alalar. Yaşav tarzı koloniyalar, ekseri olaraq, Rusiyeniñ ormanlarınen, şimaliy ve şarqiy regionlarında yerleşmekte.
2016 senesi FSB taqiqatçıları İlmi Umerovqa qarşı ekstremizm maddesi boyunca cinaiy iş açqan edi. O Rusiye Cinaiy Kodeksiniñ 280.1 maddesi (Rusiyeniñ topraq bütünligini bozmaq çağıruvları – QA) esasında qabaatlana.
Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
2017 senesi iyünniñ 7-nde istilâ etilgen Qırımda Kremlge nezaretindeki Aqmescit rayon mahkemesi İlmi Umerov davasınıñ aslını baqıp başladı.
İlmi Umerov oña nisbeten açılğan cinayet işi siyasiy renk taşığanı aqqında ayta.
