Canadada yaşağan qırımtatar diasporası Kreml nezaretindeki Qırım mahkemesiniñ qırımtatar milliy areketiniñ liderlerinden biri olğan İlmi Umrovnıñ azatlıqtan marum etilmesinen bağlı ükümini takbih etti. «Ukrinformğa» bu aqta Canadalı qırımtatarları assotsiasiyasınıñ prezidenti Rustem İrsay bilidirdi.
«Canadalı qırımtatarlar assotsiasiyası işbu üküm siyasiy renk taşıy ve bu bir cinayettir dep saya. İlmi Umerovnıñ davası tamır halqqa qarşı doğrultılğan ksenofobiya misali olıp, qırımtatarlarını qorquzmaq maqsadınen yapılmaqta. Adaletnen alâqası olmağan bu üküm yarımadada Rusiyeniñ qanunğa zıt kelgen arekeketlerine nisbeten öz narazılığını bildrgen er keske qarşı doğrultılmaqta», – dey İrsay.
O, Kremlden tez vaqıtta Umerovnen beraber diger siyasiy mabüslerni azat etmekni talap eterek, Canada akimiyet strukturalarından işbu meselege yardım etmesini rica etti.
«Biz Canada akimiyeti, halqara cemaatçılıq ve halqara uquqqorçalayıcı teşkilâtlardan siyasiy taqipnen beraber daa evel qabul etilgen mahkeme qararlarını lâğu etmesi maqsadınen Rusiye Federatsiyasınen Qırımnıñ işğalçı akimiyetine yapılğan basqını arttırılmasına çağıramız», –dep qayd etti Rustem İrsay.
Kreml nezaretindeki Aqmescit rayon mahkemesi sentâbrniñ 27-si, çarşenbe künü, qırımtatar milliy areketiniñ liderlerinden biri olğan İlmi Umerovqa nisbeten öz qararını çıqardı. Umerov eki yıllıq yaşav tarzındaki koloniyada qalmasına üküm etildi. Bunıñnen beraber, Umerovğa eki yıl devamında açıq faaliyet ile oğraşması ve kütleviy haber vastalarında çıqışta bulunması yasaqlandı.
Umerovnıñ imayesi, Rusiye apishanesi Parkinson, şeker ve yürek hastası olğan İlmi Umerovğa kerekli tibbiy yardım kösterip olamaz, dep tüşünmekte.
Yaşav tarzı koloniyası – qomşu Rusiyede ceza berüv müessiseleriniñ bir çeşitidir. Muqayıtsızlıq sebebinden cinayet işlegenler ve kiçik ya da orta ağırlıqtaki cinayetni ilk defa işlegenler bu kibi yerlerde ceza alalar. Yaşav tarzı koloniyalar, ekseri olaraq, Rusiyeniñ ormanlarınen, şimaliy ve şarqiy regionlarında yerleşe.
2016 senesi FSB taqiqatçıları İlmi Umerovqa qarşı ekstremizm maddesi boyunca cinaiy iş açqan edi. O Rusiye Cinaiy Kodeksiniñ 280.1 maddesi (Rusiyeniñ topraq bütünligini bozmaq çağıruvları – QA) esasında qabaatlana.
Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
İlmi Umerov oña nisbeten açılğan cinayet işi siyasiy renk taşığanı aqqında ayta.
