Ukrainada «Rossotrudniçestvo» Rusiye agentliginiñ temsilcilikleri, oña bağlı olğan teşkilâtlara ve Rusiye devlet qurulışları qapatılmalı. Bunı sentâbrniñ 27-de Qırımtatar Milliy Meclisiniñ reisi, Ukraina halq deputatı Refat Çubarov «Ukrinform» matbuat konferentsiyasında ayttı.
«Bazı meselelerde qararsız olğanımız Rusiyeniñ vatandaşlarımızğa qarşı yapqanlarınıñ sebebi ola... Kelecek afta zenaatdaşlarımdan soraycam: mında, Ukrainada, «Rossotrudniçestvo» ve oña bağlı teşkilâtlar ne yapa?», – dedi Çubarov.
O, bu sualni Ukraina Tışqı işler nazirligine berdi. Çubarovnıñ aytqanına köre, Qırımda qırımtatarlarnı «birer-birer degil, endi gruppalarnen yoq eteler».
«Yañı teşebbüslerni ilân etip, ükümetten (Ukraina – QA) yardım isteycekmiz, anda alıp olamasaq, siyasetçilerden soraycaqmız. Ukrainadaki «Rossotrudniçestvo» qapatılmalı, Rusiye devlet qurulışları Ukrainada çalışmamalı», – dep qayd etti Çubarov.
Kreml nezaretindeki Aqmescit rayon mahkemesi sentâbrniñ 27-si, çarşenbe künü, qırımtatar milliy areketiniñ liderlerinden biri olğan İlmi Umerovqa nisbeten öz qararını çıqardı. Umerov eki yıllıq yaşav tarzındaki koloniyada qalmasına üküm etildi. Bunıñnen beraber, Umerovğa eki yıl devamında açıq faaliyet ile oğraşması ve kütleviy haber vastalarında çıqışta bulunması yasaqlandı.
Çubarovnıñ fikirince, Rusiye qırımtatar milliy liderlerinden biri İlmi Umerovnı eki yıllıq yaşav tarzındaki koloniyada qalmasına üküm etip, oña «ölüm cezasını berdi».
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
