Link açıqlığı

Saatnıñ esas haberi

Qırımda mahküm etilgen İlmi Umerovnıñ imayesi ükümge qarşı itiraz bildirecek – Feygin


Mark Feygin
Mark Feygin

Sentâbrnin 27-nde eki yılğa yaşav tarzındaki koloniyada qalmasına üküm etilgen qırımtatar milliy areketiniñ yetekçilerinden biri İlmi Umerovnıñ imayesi bu ükümge qarşı itiraz bildirmek niyetinde. Bunı Qırım.Aqiqatqa advokat Mark Feygin bildirdi. Şimdiki vaqıtta advokatlar qısqa şikâyet azırlay.

Feygin işbu ükümni «aqılsız ve imayeniñ bütün delilerini közge almağan» olaraq tanıttı.

«Böyle bir üküm atta bu kibi şeytaniy sistema içün beklenilmegen. Bu ükümni bütünley mantıqsız saymaq mümünmiz, çünki, hatırlatayım ki, prokuror bile şartlı ceza müddetini – 3 yıl 6 ay rica etken edi. Ve bu çoq şeyni kösteredir», – dep qayd etti o.

Feyginniñ fikirine köre, İlmi Umerovnıñ tevqif etilmegeni ve evge yiberilgeni «bir büyük oyun oynalğanını» añlatmaqta. Böyle vaziyetni advokat ancaq Aleksey Navalnıyge berilgen ceza üküminde körgen edi.

Kreml nezaretindeki Aqmescit rayon mahkemesi sentâbrniñ 27-si, çarşenbe künü, qırımtatar milliy areketiniñ liderlerinden biri olğan İlmi Umerovqa nisbeten öz qararını çıqardı. Umerov eki yıllıq yaşav tarzındaki koloniyada qalmasına üküm etildi ve oña eki yılğa cemaat faaliyeti yasaq etildi.

Yaşav tarzı koloniyası – qomşu Rusiyede ceza berüv müessiseleriniñ bir çeşitidir. Muqaysızlıq sebebinden cinayet işlegenler, ve kiçik ya da orta ağırlıqta cinayetni ilk kere işlegenler bu kibi yerlerde ceza alalar. Yaşav tarzı koloniyalar, ekseri olaraq, Rusiyeniñ ormalı bölüklerinde, şimaliy ve şarqiy regionlarında yerleşe.

Keçende, rusiyeli prokuror İlmi Umerovnı 3 yıl ve 6 ay müddetine şartlı surette azatlıqtan marum etmege, oña 3 yıllıq sınav müddetini tayin etmege ve üç yıl devamında cemaat faaliyetini ve ocalıq yapmaqnı yasaqlamağa teklif etken edi.

2016 senesi FSB taqiqatçıları İlmi Umerovqa qarşı ekstremizm maddesi boyunca cinaiy iş açqan edi. O Rusiye Cinaiy Kodeksiniñ 280.1 maddesi (Rusiyeniñ topraq bütünligini bozmaq çağıruvları – QA) esasında qabaatlana.

Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.

2017 senesi iyünniñ 7-nde istilâ etilgen Qırımda Kremlge tabi olğan Aqmescit rayon mahkemesi İlmi Umerov davasınıñ asılını baqıp başladı.

İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.

XS
SM
MD
LG